Daniel Nyionkuru
Buri mwaka ku wa 25 Mata, u Rwanda rwifatanya n’Isi kwizihiza Umunsi Mpuzamahanga wo kurwanya Malariya, mu gihe hashyirwa imbaraga mu gukomeza kuyikumira no kuyirandura burundu. Ni uri urwo rwego, Ikigo cy’Igihugu gishinzwe Ubuzima mu Rwanda (RBC) cyakomeje ubukangurambaga bugamije kwigisha abaturage uko bayirinda no kuyihashya.
Nubwo hari intambwe imaze guterwa mu kugabanya iyi ndwara, haracyagaragara uduce tumwe na tumwe twibasirwa cyane, cyane cyane ahari ibishanga. Ubuyobozi bwa RBC buvuga ko hari gahunda yo gukurikirana ibyo bice ku rwego rw’imirenge, hagamijwe kubihagurukira no kubigenzura byimbitse.
Umuyobozi w’Ishami rishinzwe kurwanya Malariya n’Indwara zititaweho muri RBC, Dr. Aimable Mbituyumuremyi, yavuze ko hafashwe ingamba zihariye zo gukumira ubwandu aho bukigaragara cyane.
Yagize ati: “Umurenge wose umeze nabi tuzawutera umuti, tuvure abarwaye malariya bose kandi dukomeze ubukangurambaga.”
Yibukije abaturage ko gukurikiza amabwiriza yo gufata imiti ari ingenzi mu gukira neza no kwirinda kongera kuyandura, asaba abayirwaye kudasiba iminsi yo kuyifata.
Ati: “Niba ari iminsi itatu bakwandiye yo kunywa imiti ya malariya, ugomba kuyinywa kandi ukayimara yose uko bayiguhaye.”
Uretse imiti, abaturage basabwa gufata izindi ngamba zirimo kwirinda imibu itera malariya, by’umwihariko abatuye mu bice byibasirwa cyane. Dr. Aimable yagaragaje ko kumenya aho umuntu atuye n’uko ahura n’imibu bishobora kumufasha gufata ingamba zikwiye zo kuyirinda.
Ati: “Umuturage agomba kumenya ko niba murugo iwe hatewe umuti, akeneye n’undi wo kwisiga agiye mu kazi. Ikindi agomba kwimenya, akareba niba hari aho ahurira n’imibu ishobora kumuteza malariya, hanyuma akishyiriraho ingamba zo kuyirinda.”
Harimo kandi gukomeza gushishikariza abantu gukoresha inzitiramibu, cyane cyane mu gihe baryamye, kuko ari bumwe mu buryo bwizewe bwo kwirinda imibu. Gusa, inzitiramibu zigomba gufatwa neza kugira ngo zikomeze gukora neza.
Yagize ati: “Amabwiriza avuga ko nibura inzitiramibu ifurwa rimwe mu gihembwe, igafurishwa amazi adashyushe, kuko ukoresheje amazi ashyushe cyangwa ukayanika kuzuba ryinshi byakwica umuti uba arimo.”
Imibare ya RBC igaragaza ko mu mwaka wa 2024-2025, abarenga ibihumbi 8,000 basanzwemo Malariya, mu gihe abantu 87 bahitanywe na yo. U Rwanda rukomeje gushyira imbaraga mu kuyigabanya, aho rufite intego yo kuyihashya ku kigero cya 70% bitarenze umwaka wa 2030.
Ubu bukangurambaga buje bushimangira uruhare rw’abaturage mu kwirinda no gufatanya n’inzego z’ubuzima mu kurandura burundu iyi ndwara ikomeje kuba ikibazo mu bice bimwe by’igihugu.
Umuyobozi w’Ishami rishinzwe kurwanya Malariya n’Indwara zititaweho muri RBC, Dr. Aimable Mbituyumuremyi
RUSAGARA MUVUNANKIKO Valens
Ivan Damascene Iradukunda
