Nyuma y’imyaka 20 Arsenal yageze ku mukino wa nyuma wa UEFA Champions League

Ikipe ya Arsenal FC yo mu gihugu cy’Ubwongereza yanditse amateka mashya yo kugera ku mukino wa nyuma wa UEFA Champions League ku nshuro ya kabiri mu mateka yayo, nyuma yo gutsinda Atlético Madrid igitego 1-0 mu mukino wo kwishyura wa 1/2.

Iyi ntsinzi yatumye Arsenal ikomeza ku giteranyo cy’ibitego 2-1, kuko amakipe yombi yari yanganyije 1-1 mu mukino ubanza wabereye muri Espagne.

Ikipe ya Arsenal, itozwa na Mikel Arteta, yakinnye umukino wuzuye ubwitonzi n’ubushishozi, igaragaza imbaraga mu bwugarizi ndetse n’ubushobozi bwo gukoresha neza amahirwe yabonye. Igitego kimwe cyabonetse cyari gihagije kugira ngo iyi kipe yo mu Bwongereza ibone itike iyerekeza ku mukino wa nyuma, ibintu byari bimaze imyaka igera kuri 20 bitagerwaho n’iyi kipe yo mu majyaruguru ya Londre.

Mu mateka yayo muri Champions League, Arsenal ntabwo irigera yegukana iki gikombe. Iheruka kugera ku mukino wa nyuma muri 2006, aho yatsinzwe na FC Barcelona ibitego 2-1. Icyo gihe yabaye ikipe ya mbere yo mu mujyi wa Londres igeze kuri urwo rwego, ndetse inakora amateka yo kumara imikino 10 yikurikiranya itinjizwa igitego muri iryo rushanwa.

Imibare igaragaza ko Arsenal ari imwe mu makipe afite uburambe muri iri rushanwa, kuko imaze gukina imikino irenga 200 muri Champions League, igatsinda irenga 100. Yanagaragaje kwitwara neza mu bihe byashize, aho yitabiriye iri rushanwa imyaka 19 yikurikiranya hagati ya 1998 na 2017, ibintu byayigize imwe mu makipe akomeye i Burayi muri icyo gihe.

Muri uyu mwaka w’imikino wa 2025/26, Arsenal yagaragaje urwego rwo hejuru, aho yanageze ku mukino wa nyuma idatsinzwe mu mikino myinshi yayibanjirije. Uko kwitwara neza kugaragaza ko iyi kipe yongeye kugaruka ku rwego rwo guhatanira ibikombe bikomeye ku mugabane w’u Burayi.

Ku mukino wa nyuma, Arsenal itegereje kumenya izahura na yo hagati ya Bayern Munich na Paris Saint-Germain, zizahurira mu mukino wa 1/2 wa nyuma uteganyijwe ku munsi w’ejo. Uwo mukino wa nyuma uzaba ari amahirwe akomeye kuri Arsenal yo kugerageza kwegukana igikombe cya Champions League ku nshuro ya mbere mu mateka yayo, ibintu byayishyira mu rwego rwo hejuru mu makipe akomeye ku isi.