Ibyimana Cofi
Urwego rw’Igihugu rw’Ubugenzacyaha (RIB) rwatangaje ko mu cyumweru cy’icyunamo cyo kwibuka ku nshuro ya 32 Jenoside yakorewe Abatutsi mu 1994, rwakiriye amadosiye 47 ajyanye n’ibyaha bifitanye isano n’ingengabitekerezo ya Jenoside n’ibindi biyishamikiyeho.
Ibi byatangajwe n’Umuvugizi wa RIB, Dr. Murangira B. Thierry, ku wa Kabiri tariki ya 14 Mata 2026, mu kiganiro yagiranye n’Ikigo k’Igihugu k’Itangazamakuru (RBA).
RIB yavuze ko mu byaha byagaragaye, ihohotera rikorerwa abarokotse Jenoside ari ryo riza ku isonga, aho ryihariye amadosiye 22 angana na 44.9%. Guhakana Jenoside byagaragaye mu madosiye umunani (16.3%), mu gihe gupfobya Jenoside byagaragaye mu madosiye arindwi (14.3%).
Ibindi byaha byagaragaye birimo guha ishingiro Jenoside ku kigero cya 12.2%, ingengabitekerezo ya Jenoside ubwayo ku kigero cya 8.2%, kuzimiza cyangwa gutesha agaciro ibimenyetso bya Jenoside ku kigero cya 2%, ndetse no gusenya cyangwa konona inzibutso za Jenoside na byo ku kigero cya 2%.
RIB yagaragaje ko ugereranyije n’icyumweru cy’icyunamo cya 2025, ibi byaha byagabanutse ku kigero cya 38.1%, ibintu ivuga ko ari intambwe igaragara mu gukomeza kurwanya ingengabitekerezo ya Jenoside.
Mu butumwa yatanze, Dr. Murangira yasabye abaturage kwirinda imvugo n’ibikorwa bishobora guteza cyangwa gukwirakwiza ingengabitekerezo ya Jenoside, ashimangira ko amategeko azakomeza gukurikizwa ku buryo nta uzabura guhanwa mu gihe azagaragarwaho n’ibyaha nk’ibi.
RIB yasabye kandi Abanyarwanda gukomeza kurangwa n’ubumwe n’ubwiyunge, cyane cyane muri iki gihe cy’icyunamo, hagamijwe kubaka igihugu gitekanye, kizira amacakubiri n’ingengabitekerezo ya Jenoside.
IRADUKUNDA Ivan Damascene
RUSAGARA MUVUNANKIKO Valens
