Daniel Nyionkuru
Ikipe ya Rayon Sports yamaze gushyira ahagaragara ibiciro by’amatike ku mukino utegerejwe cyane uzayihuza na APR FC, uteganyijwe muri shampiyona y’icyiciro cya mbere mu Rwanda.
Uyu mukino uzakinwa ku wa 02 Gicurasi 2026 kuri Stade Amahoro, ukaba uri mu mikino ihanzwe amaso cyane n’abakunzi b’umupira w’amaguru mu gihugu, bitewe n’amateka n’ubukeba bw’aya makipe yombi.
Mu biciro byatangajwe, itike ya make yashyizwe ku mafaranga ibihumbi 2 Frw, mu gihe iy’igiciro kiri hejuru cyane ari Miliyoni 2 z’amafaranga y’u Rwanda, igaragaza uburyo uyu mukino ufite agaciro kihariye ku bawukunda.
Iyi gahunda yo gushyira hanze amatike ije mu gihe abafana ba Rayon Sports n’aba APR FC bamaze igihe bategereje uyu mukino, ufatwa nk’uw’ingenzi kurusha indi mu mwaka kubera amateka y’aya makipe.
Aya makipe aheruka guhura mu kwezi kwa Mutarama 2026, ubwo yakinaga umukino wa nyuma w’igikombe cya Super Cup, icyo gihe APR FC yatsinze Rayon Sports ibitego 4-1, ibintu byasize igikomere ku bakunzi ba Rayon.
Uyu mukino uteganyijwe muri Gicurasi utegerejwe nk’umwanya wo kwishyura ku ruhande rwa Rayon Sports, mu gihe APR FC yo izaba ishaka gukomeza kwerekana ko igihagaze neza imbere y’umukeba wayo ukomeye.
Abakurikiranira hafi ruhago mu Rwanda bemeza ko uyu mukino ushobora kuzaba ari umwe mu ikomeye kurusha indi muri uyu mwaka wa shampiyona, bitewe n’ihangana rikomeye risanzwe riri hagati y’aya makipe yombi.
RUSAGARA MUVUNANKIKO Valens
Ibyimana Cofi
